कृषि प्रवर्द्धन समितिको अवलोकन भ्रमण (२०८२ भाद्र १)

मकवानपुर उद्योग वाणिज्य संघ अन्तर्गत रहेको कृषि प्रवर्द्धन समितिले आइतबार कृषि फार्म भ्रमण गरेको छ । समितिका संयोजक निलम कुमारी पाण्डेको नेतृत्वमा भ्रमण टोलीले हेटौंडा–१३, पदमपोखरीस्थित एम एन एस एग्रो प्रालिमा अवलोकन भ्रमण गरेको हो । एम एन एस एग्रो प्रालिले ड्राइगन फ्रुट, मेवा, बाख्रापालन जस्ता कृषिजन्य कार्यहरु गर्दैआएको छ । कृषि उद्यम गर्न ईच्छुक किसानहरुले उक्त फार्ममा गई अध्ययन अवलोकन गर्न सकिने देखिन्छ । एम एन एस एग्रो प्रालिले एक बिगाह जमिनमा कृषि फार्म संचालन गरिरहेको छ । फार्मका संचालक फ्रेन्चु लामा कृषि प्रवर्द्धन समितिको पनि सदस्य हुनुहुन्छ भने आफ्नो रिसर्च अनुभवसहित कृषि सम्बन्धी जिज्ञासा हुनेहरुलाई मार्गदर्शन गर्न सक्षम हुनुहुन्छ । उहाले ड्राइगन फ्रुट एक पटक लगाएपछि १५ वर्षसम्म उत्पादन लिन सकिने र एक वर्षभित्रमा पटक–पटक उत्पादन हुने बताउनुभयो । ड्राइगन फ्रुट आयआर्जनको लागि सम्भावनायुक्त रहेको उहाले बताउनुभयो । ड्राइगन फ्रुटको विरुवालाई नियमित स्याहार गर्नुपर्ने उहाको भनाइ थियो । उहाले ड्राइगन फ्रुटलाई केही दिनसम्म सुरक्षित स्टोर गर्न दुई कोठे कोल्ड चेम्बर बनाएको बताउनुभयो । त्यसैगरी उहाले ८० वटा बाख्राको लागि आधुनिक खोर निर्माण गरी संचालन गरिरहनुभएको छ । हेटौंडा उपमहानगरपालिकाले कार्यविधि बनाइ ५ वर्षको लागि उपलब्ध गराएको कृषि एम्बुलेन्सलाई समिति बनाइ कार्यविधि अनुरुप संचालन गररहनुभएको उहाले बताउनुभयो ।   
कृषि प्रवर्द्धन समितिका संयोजक निलम कुमारी पाण्डेले संघका अध्यक्ष प्रमोद सिंह रानभाटले अवलोकन भ्रमण सफल बनाउन सघाउनुभएको र स्थलगत अवलोकन भ्रमण तथा बैठकले उत्साहित महशुस गरेको बताउनुभएको थियो । त्यसैगरी समितिका सदस्य हरिसरण अधिकारीले कृषि उद्यमी फ्रेन्चु लामाको उद्यम प्रति रहेको लगावको प्रशंसा गर्नुहुदै अन्यको लागि प्रेरणाको श्रोत हुनसक्ने बताउनुभएको थियो । भ्रमणमा महिला उद्यमी विकास समितिका पूर्वकावा सभापति देव कुमारी ढकाल, कृषि प्रवर्द्धन समितिका सदस्यहरु विवेक सुवेदी, लक्ष्मी अधिकारी, अभिषेक अधिकारी, महिला उद्यमी बिमला ढकाल र संघका कार्यकारी सचिव पवन कार्कीको सहभागिता रहेको थियो ।