बागमती प्रदेशका मुख्यमन्त्री तथा मन्त्रीज्यूहरुको स्वागत (२०८२ भाद्र ४)

मकवानपुर उद्योग वाणिज्य संघले बागमती प्रदेशका नव नियुक्त मुख्यमन्त्री ईन्द्र बहादुर बानिया र मन्त्रीज्यूहरुको स्वागत तथा सम्मान कार्यक्रम गरेको छ । संघका अध्यक्ष प्रमोद सिंह रानाभाटको अध्यक्षतामा भएको कार्यक्रममा नव नियुक्त मुख्यमन्त्री ईन्द्र बहादुर बानिया, विभिन्न मन्त्रालयका मन्त्रीहरु, नेपाल उद्योग वाणिज्य महासंघका वरिष्ठ उपाध्यक्ष अञ्जन कुमार श्रेष्ठ, केन्द्रीय सदस्य तथा कृषि उद्यम केन्द्रका सभापति डिवि बस्नेत, केन्द्रीय सदस्यहरु शिव प्रसाद घिमिरे, कृष्ण कटुवाल र राजकुमार न्यौपाने, नेपाल उद्योग वाणिज्य महासंघ बागमती प्रदेशका उपाध्यक्ष गुणराज श्रेष्ठ, कार्यकारिणी सदस्य उत्तमशर्मा ढकाललगायतको आतिथ्यता रहेको थियो । कार्यक्रममा संघका पूर्वअध्यक्षहरु, सल्लाहकारहरु, कार्यसमितिका पदाधिकारी तथा सदस्यहरु, बस्तुगत संघका अध्यक्षहरु, महिला उद्यमीहरु, उद्योगी/व्यवसायीहरु र पत्रकारहरुको सहभागिता रहेको थियो ।
मउवासंघ अध्यक्ष प्रमोद सिंह रानाभाटले नव नियुक्त मुख्यमन्त्री, मन्त्रीहरु र नेपाल उद्योग वाणिज्य महासंघबाट आउनुभएका अतिथिहरुलाई स्वागत गर्नुहुदै समसामयिक मागहरु समेटी मन्तव्यमार्फत ध्यानाकर्षण गराउनुभएको थियो । उहाले आतंकवादको चपेटामा देश नहुदा पनि आतंकवाद बीमा शिर्षकमा अनावश्यक रुपमा प्रिमियम अशुल्ने काम भइरहेको, विभिन्न कारणले स्क्र्यापमा गएका सवारीसाधनहरुको वार्षिक कर तथा जरिवाना नबुझाएको भनि दर्ता खारेजी नहुने अवस्था रहेकोले चालु आवको मात्र कर बुझाएर दर्ता खारेजी गर्न पाउने सुविधाको व्यवस्था हुनुपर्ने, मउवासंघमा स्थापित बिजनेस ईन्क्युबेसन सेन्टरलाई स्रोत केन्द्रको रुपमा विकास गर्न बजेटको आवश्यक्त रहेको, हरेक वर्ष हेटौंडामा रोजगार मेला आयोजना गर्न मउवासंघलाई बजेट विनियोजन गर्दा प्रभावकारी हुने, स्टार्टअपलाई प्रोत्साहित गर्न बागमती प्रदेश स्तरीय स्टार्टअप परिषद् गठन तथा उक्त परिषद्मार्फत सहुलियतपूर्ण कर्जाको व्यवस्था गर्दा युवा पलायनलाई रोक्न सकिने, प्रदेश सरकारका पाहुनाहरुलाई सुरक्षित एवम् व्यवस्थित बासको लागि मउवासंघको पल्पसा सदन परिसरमा प्रदेश स्तरीय अतिथि सदन निर्माण गर्न डिपिआर तयार गरी मुख्यमन्त्रीज्यूको कार्यालयमा दर्तासमेत गरिसकेकोले आर्थिक सहकार्यको अपेक्षा गरेको, क्रसरजन्य उद्योगहरु सुचारु गर्न भूगोल अनुसारको मापदण्ड तयार गरी आन्तरिक माग पुरा गर्दै विदेश निर्यात गरी वैदेशिक मुद्रा आर्जनको सुनिश्चितता गर्नुपर्ने, हेटौंडाको मुख्य बजारको सडक विस्तारको सन्दर्भमा सम्मानित सर्वोच्च अदालतबाट जारी निर्णयको कार्यान्वयन गर्नुपर्ने र कुनै पनि प्रकृतिका व्यवसाय सूरु गर्न र नविकरण गर्न उद्योग वाणिज्य संघको सिफारिस पुनः अनिवार्य गर्ने व्यवस्था मिलाउनुपर्ने, प्रभावकारी बजार व्यवस्थापनका लागि अटो भिलेज क्षेत्र, कृषि हाट बजार, स्क्र्याप भिलेज र अन्य साना उद्योग तथा व्यवसायहरुको निश्चित क्षेत्र निर्धारण गरी व्यवस्थापन गर्दै निजी क्षेत्रसंग पिपिपि अवधारणामा सहकार्य गर्दा उपयुक्त हुने उल्लेख गर्नुभएको थियो । त्यसैगरी औद्योगिक वातावरणलाई प्रोत्साहित गर्न उत्पादनमूलक उद्योगलाई उद्योग स्थापनाको पहिलो पांच वर्षसम्म कर छुटको व्यवस्था गर्नुपर्ने, सिन्धुली हेटांैडा सडकको रुट परमिटको व्यवस्था गर्नुपर्ने, उद्योग वाणिज्य संघको व्यवस्थापन, पालिकाको जमिन र प्रदेश सरकारको लगानी रहनेगरी पिपिपि अवधारणामा व्यवसायिक मल्टी कम्प्लेक्स निर्माण गरी सहकार्यको उहाले प्रस्ताव गर्नुभएको थियो । 
कार्यक्रममा नेपाल उद्योग वाणिज्य महासंघका वरिष्ठ उपाध्यक्ष अन्जन कुमार श्रेष्ठले महासंघ प्रदेश सरकारसंग सहकार्य गर्न तयार रहेको उल्लेख गर्नुभयो । संघीय राजधानीसंग जोड्ने सडकमार्गलाई सहज बनाउन ध्यानाकर्षण गराउनुहुदै उहाले बजेटमा काठमाडौंबाट उद्योग सार्ने विषयमा प्रदेश सरकारको ध्यानाकर्षण गराउनुभयो । काठमाडौं उपत्यकाका उद्योगीहरु नजिकै उपयुक्त स्थानमा व्यवस्थापन होस् भन्ने अपेक्षा गरेको बताउनुहुदै मयुरधाप र शक्तिखोर औद्योगिक क्षेत्र तयार सिघ्र तयार गर्न प्रदेश सरकारले पहल गर्नुपर्ने बताउनुभएको थियो । प्याकेजिङ कम्पनीमा वातावरण कर लगाएर लागत बढाउने काम भएको भन्दै उहाले करको विषयमा पुनर्विचान गर्न आग्रह गर्नुभएको थियो ।
बागमती प्रदेशका नवनियुक्त मुख्यमन्त्री ईन्द्रबहादुर बानियाले कार्यक्रममा मन्तव्य राख्नुहुदै निजी क्षेत्रसंग मिलेर काम गर्ने बताउनुभएको छ । संघीय सरकार र स्थानीय सरकारसंग समन्वय गरेर प्रदेश सरकारलाई उदाहरणीय बनाएर देखाउने ईच्छा रहेको, निजी क्षेत्रसंग सल्लाह गरेर करको दर नभई दायरा बढाएर आम्दानी बढाउने योजना पनि प्रस्तुत गर्नुभयो । हुनेखानेसंग कर लिएर हुंदा खानेको सेवा गर्नुपर्ने बताउनुभयो । आफ्नो नेतृत्वको सरकारले निजी क्षेत्रलाई अन्याय हुने गरी काम नगर्ने उहाको प्रष्ट धारणा थियो । हेटौंडा बजारको सडकको विषय आफ्नै कार्यकालमा उचित निर्णय गरिने उहाले बताउनुभयो । बजार क्षेत्रको सडक १६ मिटर कायम गर्न तयार हुनुपर्ने बताउनुहुदै हेटौंडा बजारको अस्थित्व बचाउदै मयुरधापबाट राजमार्ग निर्माण गनुपर्ने बताउनुभयो । व्यवसायीको पीडा, समस्या बुझेको उल्लेख गर्नुहुदै मकवानपुरको मयुरधाप र चितवनको शक्तिखोर औद्योगिक क्षेत्र विकास गरी उद्योग स्थापनासंगै रोजगारीको अवसर सिर्जना गर्ने उहांले बताउनुभयो । आफू नेतृत्वको प्रदेश सरकारले आफ्नो खर्च घटाउने पनि मुख्यमन्त्री ईन्द्र बहादुर बानियाले कार्यक्रममा बताउनुभएको थियो ।